ಕರ್ನಾಟಕದ ಗಾಂಧಿ

ಕರ್ನಾಟಕದ ಗಾಂಧಿ ನೀಲಕಂಠಜಿ ಗಣಾಚಾರಿ.

Dec 9 2014 7:16AM

 ಡಾ.ಪ್ರಕಾಶ ಗ.ಖಾಡೆ
ಗಾಂಧಿ ತತ್ವಗಳ ಅನುಷ್ಠಾನದಲ್ಲಿ ತಮ್ಮ ಜೀವಿತದ ಉದ್ದಕ್ಕೂ ದುಡಿದು ಗಾಂಧಿ ಕನಸಿನ ಆದರ್ಶ ಗ್ರಾಮಗಳ ಸ್ಥಾಪನೆಯಲ್ಲಿ ಕರ್ನಾಟಕದಲ್ಲಿ ವಿಶಿಷ್ಟ ಪ್ರಯೋಗಗಳನ್ನು ಮಾಡಿ ಹೆಸರಾದ ನೀಲಕಂಠಜಿ ಗಣಾಚಾರಿಯವರು 94 ವರ್ಷಗಳ ಸಾರ್ಥಕ ಬದುಕನ್ನು ಬದುಕಿ 2010 ಡಿಸೆಂಬರ್ 14 ರಂದು ನಮ್ಮನ್ನಗಲಿದರು.ಇವರ ಕಾರ್ಯಕ್ಷೇತ್ರವಾದ ಬಾದಾಮಿ ತಾಲೂಕಿನ ನರನೂರ ಗ್ರಾಮದಲ್ಲಿ ಸಮಾಧಿಯಿದ್ದು ಇಲ್ಲಿ ಪ್ರತಿ ವರ್ಷ ಗಾಂಧಿಲೋಕದ ಅವಧೂತ ನೀಲಕಂಠಜಿ ಅವರ ಪುಣ್ಯತಿಥಿ  ಜರುಗುತ್ತಿದೆ.
ನೀಲಕಂಠ ಗೊರಚಯ್ಯ ಗಣಾಚಾರಿ ಅವರು ಜೂನ 10 ,1916 ರಂದು ಬೆಳಗಾವಿ ಜಿಲ್ಲೆ ಸವದತ್ತಿ ತಾಲೂಕಿನ ಹೊಸೂರು ಗ್ರಾಮದಲ್ಲಿ ಜನಿಸಿದರು.ಬಾಲಕರಿರುವಾಗಲೇ ಸ್ವಾತ್ರಂತ್ಯ ಚಳುವಳಿಯಲ್ಲಿ ಧುಮುಕಿದರು.ಬಾಲಕ ನೀಲಕಂಠ 4 ನೇ ತರಗತಿ ಓದುತ್ತಿರುವಾಗಲೇ ಎಲ್ಲೆಡೆ ಸ್ವರಾಜ್ಯ ಆಂದೋಲದ ಮಾತು. ವಿದ್ಯಾರ್ಥಿ ನೀಲಕಂಠನನ್ನು ಶಿಕ್ಷಕರು ಹೊಸೂರಿನಿಂದ ಬೈಲಹೊಂಗಲಕ್ಕೆ ವರ್ತಮಾನ ಪತ್ರಿಕೆಗಳನ್ನು ತರಲು ಕಳಿಸುತ್ತಿದ್ದರು.ಹೊಸೂರು ಗಂಡುಮೆಟ್ಟಿನ ನೆಲ.ಸ್ವಾತ್ರಂತ್ಯ ಆಂದೋಲನಕ್ಕೆ ಈ ಪುಟ್ಟ ಗ್ರಾಮದ ಕೊಡುಗೆ ದೊಡ್ಡದು.ಇಲ್ಲಿ ಗಾಂಧಿ,ನೆಹರು,ವಲ್ಲಭಾಯಿ ಪಟೇಲರು ಬಂದುಹೋಗಿದ್ದಾರೆ.ಈ ಹೋರಾಟಗಾರರ ಪ್ರಭಾವವೇ ನೀಲಕಂಠಜಿ ಅವರ ಮೇಲಾಗಿ ಇವರು ಆಗಿನಿಂದಲೇ ಇಡೀ ಬದುಕನ್ನು ರಾಷ್ರಕ್ಕಾಗಿ ಮುಡಿಪಿಟ್ಟರು.
ಗಾಂಧೀಜಿ 1937 ರಲ್ಲಿ ಬೆಳಗಾವಿ ಜಿಲ್ಲೆ ಹುದಲಿ ಗ್ರಾಮಕ್ಕೆ ಬಂದಾಗ ಇವರು ಗಾಂಧಿ ಒಟ್ಟಿಗೆ 50 ಮೈಲು ನಡೆದುಕೊಂಡು ಹೋದರು.ಅಲ್ಲಿ ಅವರೊಂದಿಗೆ ಮಾತನಾಡುವ ಅವಕಾಶ ದೊರೆಯಿತು.ನೀಲಕಂಠಜಿ ಅವರ ಖಾದಿ ಮತ್ತು ಗಾಂಧಿ ತತ್ವಗಳ ಒಲವನ್ನು ಕಂಡ ಗಾಂಧಿವಾದಿ ಕೌಜಲಗಿ ಹನಮಂತರಾಯರು ತಮ್ಮ ಚರಕಾ ಸಂಘದಲ್ಲಿ ಸೇರಿಸಿಕೊಂಡು ಖಾದಿಯ ಶಿಕ್ಷಣಕ್ಕಾಗಿ ಇವರನ್ನು ವಾರ್ಧಾಕ್ಕೆ ಕಳಿಸಲಾಯಿತು.ಮುಂದೆ ಹುದಲಿಯ ಜಮ್ನಾಲಾಲ ಖಾದಿ ವಿದ್ಯಾಲಯದಲ್ಲಿ ಖಾದಿ ಶಿಕ್ಷಣ ಪೂರೈಸಿದರು.1942 ರ ಚಳುವಳಿ ಸಂದರ್ಭದಲ್ಲಿ ಮುನವಳ್ಳಿ ಬಳಿ ಇವರನ್ನು ಬಂಧಿಸಿ 5 ತಿಂಗಳುಗಳ ಕಾಲ ಜೈಲಿಗೆ ಹಾಕಿದರು.ಜೈಲಿನಿಂದ ಬಿಡುಗಡೆಯಾಗಿ ಬಂದು ಖಾದಿ ನೇಯ್ಗೆಯ ಶಿಕ್ಷಣ ಕೊಡಲು ಅಮರಗೋಳ,ಗೊಬ್ಬರಗುಂಪಿ,ಹುಣಸೀಕಟ್ಟಿ ಗ್ರಾಮಗಳಿಗೆ ತೆರಳಿದರು.ಅಮರಗೋಳದಲ್ಲಿ ಮಾಡುತ್ತಿದ್ದ ಇವರ ಕೆಲಸದ ವರದಿ ಗಾಂಧೀಜಿಯವರನ್ನು ತಲುಪಿದಾಗ ಗಾಂಧಿಜಿಯವರ ಕಾರ್ಯದರ್ಶಿಯವರಿಂದ ನೀಲಕಂಠಜಿ ಅವರಿಗೆಪತ್ರ ಬಂತು. ಅದರಲ್ಲಿ "ತಾವು ಹಳ್ಳಿಗಳಲ್ಲಿ ಸೇವಾ ಸಲುವಾಗಿ ಕೂತಿದ್ದೀರಿ,ಅದರ ವರದಿಯನ್ನು ನನಗೆ ತೋರಿಸಿದರು.ಗಾಂಧಿಜಿಯವರು ಇದನ್ನೇ ಇಚ್ಛೆ ಮಾಡುತ್ತಾರೆ,ಹೊಸ ತರುಣರು ಹಳ್ಳಿ ಹಳ್ಳಿಗೆ ಹೋಗಿ ಸೇವೆ ಮಾಡಲಿಕ್ಕೆ ತೊಡಗಬೇಕು.ಪ್ರತಿಯೊಂದು ಒಳ್ಳೆಯ ಕೆಲಸದಲ್ಲಿ ಗಾಂಧೀಜಿಯವರ ಆಶೀವರ್ಾದವಿದೆ".ಸೇವಾಶ್ರಮದ ವಿದ್ಯಾಲಯದ ಪ್ರಾಚಾರ್ಯ ನರಹರಿ ಪರೇಖ ಈ ಪತ್ರ ಬರೆದಾಗ ನೀಲಕಂಠಜಿ ಅವರಿಗೆ ಹಳ್ಳಿಗಳಲ್ಲಿ ಕೆಲಸ ಮಾಡುವ ಶ್ರದ್ಧೆ ಮತ್ತಷ್ಟು ಬೆಳೆಯಿತು.     ನೀಲಕಂಠಜಿಯವರು ವಿನೋಬಾರ ಕರೆಯ ಮೇರೆಗೆ ಕೇರಳ,ತಮಿಳುನಾಡು.ಪಶ್ಚಿಮ ಬಂಗಾಳ ರಾಜ್ಯಗಳಲ್ಲಿ ಗೋಹತ್ಯಾ ನಿಷೇಧಕ್ಕಾಗಿ ಪಾದಯಾತ್ರೆ ಕೈಕೊಂಡು ಜನಜಾಗೃತಿ ಮೂಡಿಸಿದರು.

ಮಹಾರಾಷ್ಟ,ರಾಜ್ಯಸ್ಥಾನ,ಉತ್ತರ ಪ್ರದೇಶ,ಬಿಹಾರ ಮೊದಲಾದ ರಾಜ್ಯಗಳಲ್ಲಿ ಸರ್ವೋದಯ ಕೆಲಸಕ್ಕಾಗಿ ಒಂದು ವರ್ಷಗಳ ಕಾಲ ಸಂಚರಿಸಿದರು.ಗಾಂಧಿ ತತ್ವಗಳ ರಚನಾತ್ಮಕ ಕಾರ್ಯ ಮಾಡಲು ಹೊಸೂರು, ಗುರ್ಲಹೊಸೂರು ,ಗೊಬ್ಬರಗುಂಪಿ, ನರಗುಂದ, ಕಲಹಾಳ, ಶಿಗ್ಲಿ, ಉಗಲವಾಟ, ಮಲಘಾಣ, ಕೃಷ್ಣ ಕಿತ್ತೂರ, ಸುರೇಬಾನ ಮತ್ತು ನರೆನೂರ ಗ್ರಾಮಗಳನ್ನು ಆಯ್ಕೆ ಮಾಡಿಕೊಂಡರು. ಇಲ್ಲಿ ಗಾಂಧೀಜಿಯವರ ತತ್ವಗಳಾದ ಸತ್ಯ,ಅಹಿಂಸೆಗಳ ಮೂಲಕ ಖಾದಿ ಗ್ರಾಮೋದ್ಯೋಗ,ಪಾನ ನಿರೋಧ, ಗೋಹತ್ಯಾ ನಿಷೇಧ, ಗ್ರಾಮ ಸುಧಾರಣೆ, ಗ್ರಾಮ ಸ್ವಚ್ಛತೆ, ಗ್ರಾಮ ಸ್ವರಾಜ್ಯ ಮೊದಲಾದ ಕಾರ್ಯಕ್ರಮಗಳನ್ನು ಅನುಷ್ಟಾನಗೊಳಿಸಿದರು. ಹೊಸೂರು, ಶಿಗ್ಲಿ, ಸುರೇಬಾನ, ಶಿರೋಳ, ಮಲಘಾಣ, ಕೃಷ್ಣ ಕಿತ್ತೂರುಗಳಲ್ಲಿ ಪ್ರೌಢ ಶಾಲೆಗಳನ್ನು ಆರಂಭಿಸಿ ಸಾವಿರಾರು ವಿದ್ಯಾರ್ಥಿಗಳಿಗೆ ಗಾಂಧೀಜಿಯವರ ತತ್ವಗಳನ್ನು ಅಳವಡಿಸಿಕೊಳ್ಳಲು ಕರೆ ನೀಡಿದರು.ಅನೇಕ ಹಳ್ಳಿಗಳಲ್ಲಿ ಇವರು ಇಡೀ ಊರನ್ನೇ ಹಿಂಸಾರಕ್ಕೆ ಇಳಿಸುತ್ತಿದ್ದ ಮನೆತನದ ವಾಜ್ಯಗಳನ್ನು ಶಾಂತಿ ಸಮಾಧಾನಗಳಿಂದ ಬಗೆಹರಿಸಿ ಸೌಹಾರ್ದತೆಯ ವಾತಾವರಣ ಮೂಡಿಸಿದ್ದಾರೆ. ಗಾಂಧಿ ತತ್ವಗಳನ್ನು ಎಲ್ಲ ವಿಧಗಳಿಂದಲೂ ಕಾರ್ಯರೂಪಕ್ಕೆ ತಂದ ಇವರ ಅಪಾರ ಸೇವೆಯನ್ನು ಪರಿಗಣಿಸಿ ಕರ್ನಾಟಕ ರಾಜ್ಯ ಸರಕಾರವು 1992ರ ಸಾಲಿನ ರಾಜ್ಯೋತ್ಸವ ಪ್ರಶಸ್ತಿ ನೀಡಿ ಗೌರವಿಸಿತ್ತು. ಇವರ ಮಕ್ಕಳಾದ ಪಂಚಾಕ್ಷರಯ್ಯ ಗಣಾಚಾರಿ, ಗಂಗಯ್ಯಾ ಗಣಾಚಾರಿ ಬಂಧುಗಳಾದ ಡಾ.ರುದ್ರಯ್ಯಾ ಭಂಡಾರಿ ಮೊದಲಾದವರು ನೀಲಕಂಠಜಿಯವರ ತತ್ವಾದರ್ಶಗಳನ್ನು ಮುಂದುವರೆಸಿಕೊಂಡು ಬರುತ್ತಿದ್ದಾರೆ.

ನೀಲಕಂಠಜಿ ಗಣಾಚಾರಿಯವರು ತಮ್ಮ 94 ನೇ ವಯಸ್ಸಿನಲ್ಲಿ ಸೇವೆಯಲ್ಲಿರುವಾಗಲೇ ಡಿಸೆಂಬರ್ 14.2010 ರಲ್ಲಿ ತೀರಿಕೊಂಡರು.ಇವರ ಕಾರ್ಯಕ್ಷೇತ್ರವಾದ ಬಾದಾಮಿ ತಾಲೂಕಿನ ನರೆನೂರ ಗ್ರಾಮದಲ್ಲಿ ಸಮಾಧಿಯಿದ್ದು ಸ್ಮಾರಕವಾಗಿ ನಿರ್ಮಾಣವಾಗುತ್ತಿದೆ.ಪ್ರತಿ ವರ್ಷ ಜರುಗುವ ಪುಣ್ಯತಿಥಿ ಕಾರ್ಯಕ್ರಮಕ್ಕೆ ನಾಡಿನೆಲ್ಲೆಡೆಯಿಂದ ಅದರಲ್ಲೂ ಬೆಳಗಾವಿ, ಧಾರವಾಡ, ವಿಜಯಪುರ, ಬಾಗಲಕೋಟ ಜಿಲ್ಲೆಗಳ ಸಾವಿರಾರು ಕಾರ್ಯಕರ್ತರು, ಗಾಂಧಿ ಅನುಯಾಯಿಗಳು,ಮಠಾಧೀಶರು ಪಾಲ್ಗೊಳ್ಳುತ್ತಾರೆ. ವಿಜಯಪುರದ ಶ್ರೀ ಸಿದ್ದೇಶ್ವರಸ್ವಾಮಿಜಿ ಮೊದಲಾದವರು ಪಾಲ್ಗೊಳ್ಳುವ ಈ ಬಾರಿಯ ಪುಣ್ಯತಿಥಿ ಕಾರ್ಯಕ್ರಮವು ಡಿಸೆಂಬರ 10 ರಂದು ಬಾದಾಮಿ ತಾಲೂಕಿನ ನರೆನೂರ ಗ್ರಾಮದಲ್ಲಿ ಜರುಗುತ್ತಿದೆ.
ಲೇಖಕರ ವಿಳಾಸ :
ಡಾ.ಪ್ರಕಾಶ ಗ.ಖಾಡೆ.ಶ್ರೀಗುರು,ಮನೆ ನಂ. ಎಸ್.135.ಸೆಕ್ಟರ್ ನಂ.63,ನವನಗರ,ಬಾಗಲಕೋಟ. ಮೊ.-9845500890

Related Tags: Neelakanthaji Ganachari, Karnataka Gandhi, Badami Taluk, Dr. Prakash Khade, kannada Article,

ಉಮೇಶ ತಿಮ್ಮಾಪುರ ಸಾಹಿತ್ಯಾವಲೋಕನ : ರಾಗಂ ಬರಹ

ಕಾವಲು ನಿಲ್ಲಿಸಿದ್ದೇನೆ ಕಾವ್ಯವನ್ನು

     ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಕದಳಿ ಮಹಿಳಾ ವೇದಿಕೆ, ತಾಲೂಕಾ ಶರಣ ಸಾಹಿತ್ಯ ಪರಿಷತ್, ಜಲಮಿತ್ರ ರಂಗ ವೇದಿಕೆ, ಚುಟುಕು ಸಾಹಿತ್ಯ ಪರಿಷತ್, ಮರುಳ ಸಿದ್ಧೇಶ್ವರ ಯುವಕ ಮಂಡಳಗಳ ಸಹಕಾರದೊಂದಿಗೆ ಗೆಳೆಯ ಉಮೇಶ ತಿಮ್ಮಾಪುರ ಅವರ ಸಾಹಿತ್ಯ ಅವಲೋಕನ ಕಾರ್ಯಕ್ರಮವನ್ನು ಮುಂಡರಗಿಯ ಕೆ.ಆರ್.ಬೆಲ್ಲದ ಕಾಲೇಜನಲ್ಲಿ ದಿನಾಂಕ 20/04/2014 ರ ರವಿವಾರದಂದು ಹಮ್ಮಿಕೊಳ್ಳಲಾಗಿತ್ತು. ಉದ್ಘಾಟನೆಗೆ ನನ್ನೊಂದಿಗೆ ಕುಂ.ವೀರಭದ್ರಪ್ಪ, ಮುಖ್ಯ ಅತಿಥಿಯ ಪಾತ್ರಕ್ಕೆ ನಾನು. ಗೋಷ್ಠಿ ಒಂದರಲ್ಲಿ ಗೆಳೆಯರಾದ ಪ್ರಕಾಶ ಖಾಡೆ, ವಿದ್ಯಾ ಕುಂದರಗಿ, ಸಾವಿತ್ರಿ ಮುಜುಂದಾರ ಕವಿಗೋಷ್ಠಿಯಲ್ಲಿ ವಡ್ಡಗೆರೆ ನಾಗರಾಜಯ್ಯ, ರಾಜೇಶ್ವರಿ.ಎನ್ ಹಾಗೂ ಉಳಿದ ಇಪ್ಪತ್ನಾಲ್ಕು ಕವಿಗಳು, ಸಮಾರೋಪಕ್ಕೆ ಗೆಳೆಯರಾದ ಡಾ.ಬಾಳಾಸಾಹೇಬ ಲೋಕಾಪೂರ, ವೆಂಕಟಗಿರಿ ದಳವಾಯಿ, ಡಾ. ನಿಂಗು ಸೊಲಗಿ ಹಾಗೂ ಜೋಳದ ಕೂಡ್ಲಿಗಿ.

     ಚಿಕ್ಕಮಂಗಳೂರು, ಹರಿಹರ, ಹೂವಿನ ಹಡಗಲಿ ಮಾರ್ಗವಾಗಿ ಹಿಂದಿನ ದಿನ ಮುಂಡರಗಿಯನ್ನು ತಲುಪಿದ ನಾನು ಸರಿಯಾಗಿ ಎರಡು ರಾತ್ರಿ ಉತ್ತರ ಕರ್ನಾಟಕದ ಊಟ, ವಿಚಾರ ಹಾಗೂ  ಪ್ರೀತಿಯ ಜಾತ್ರೆಯಲ್ಲಿ ಇದ್ದೆ ಎಂದೇ ಹೇಳಬೇಕು. 

ಕಾವಲು ನಿಲ್ಲಿಸಿದ್ದೇನೆ

ಕಾವ್ಯವನ್ನು, ಸತ್ಯ ಸಂಘರ್ಶಗಳ

ಬೆನ್ನಿಗೆ ಪದ ಗುಚ್ಚಗಳನ್ನೇರಿಸಿ

ಜಾತಿ-ಮತದ ಗಡಿಯಲಿ

ಸಾಲು ಕಟ್ಟಿದ್ದೇನೆ ಸಮಾನತೆಯ

ಅಸಮಾನತೆಯ ಕಟುಸಂಕೋಲೆಯ

ಲಾಂಛನ ಕಿತ್ತೆಸೆದು

        ಹೀಗೆ ಕವಿತೆಗೊಂದು ಕಾಯಕ ಕಟ್ಟಿ ‘ಬಿರಿದ ನೆನಪುಗಳು’, ‘ಮೆಘಧ್ವನಿ’, ‘ತ್ವಯ್ದ ಬದುಕಿನ ಸಾಲು’. ‘ಒರತೆ’, ‘ಕಾಡುದಾರಿಯ ಕಂದಿಲುಗಳು’, ‘ನಡುಹಗಲ ಸಂಜೆ’, ‘ಸಮುಕ್ಷ’, ‘ಕಥಾಲೋಕ’ ಹತ್ತು ಹಲವಾರು ಕೃತಿಗಳನ್ನು ರಚಿಸಿ, ನನ್ನೊಂದಿಗೆ ನಮ್ಮವನಾಗಿ ಎಲ್ಲರನ್ನು ‘ಅಣ್ಣಾ’ ಎನ್ನುವ ಸಂಬೋಧನೆಯಿಂದಲೇ ಬಾಚಿ ತಬ್ಬುವ ಉಮೇಶನ ಸಾಹಿತ್ಯದ ವಿಮರ್ಶೆಗೆ ಇನ್ನೂ ದೀರ್ಘವಾದ ದಾರಿಯಿದೆ, ಸಮಯವೂ ಇದೆ. ಆದರೆ ಬರಹವನ್ನು ಅತ್ಯಂತ ಪ್ರೀತಿ ಮತ್ತು ಗೌರವದಿಂದ ಎತ್ತಿಕೊಂಡಿರುವ ಇಂಥ ಗೆಳೆಯನನ್ನು ಪ್ರೋತ್ಸಾಹಿಸಬೇಕಾದುದು ನಮ್ಮ ಧರ್ಮವಾಗಿದೆ. ಬಾಗಲಕೋಟೆಯ ಸಕ್ರಿ ಕಾಲೇಜಿನಲ್ಲಿ ಅಧ್ಯಾಪಕರಾಗಿರುವ ಉಮೇಶ ಇದೇ ಮುಂಡರಗಿ ತಾಲೂಕಿನ ಕೆಲುರು ಗ್ರಾಮದವ. 42 ವಯಸ್ಸಿನ ಈ ನನ್ನ ಗೆಳೆಯನಿಗೆ ಸಾವಿರಾರು ಕನಸುಗಳು ಇವೆ. ಅವುಗಳನ್ನು ಕಾಪಾಡಿಕೊಂಡರೆ ಸಾಗಿದಷ್ಟು ದಾರಿಯೂ ಇದೆ. ಅವನ ಕಾವ್ಯ ಕುರಿತು ಮುಂಡರಗಿಯಲ್ಲಿ ಮಾತನಾಡುತ್ತ ನಾನು ಒಂದು ಮಾತನ್ನು ಹೇಳಿದೆ : With the magnanimity of innocence poets take birth, but alas! With individual hypocrisy they die. ಇದೊಂದು ಸ್ಥಳೀಯ ರೋಗ. ಎಷ್ಟೆಲ್ಲ ಪ್ರತಿಭೆ ಇರುವ ಅದೆಷ್ಟೋ ಬರಹಗಾರರು ಇದರಿಂದ ಬಿಡಿಸಿಕೊಳ್ಳುವದಾಗಿಲ್ಲ. ಪರಸ್ಪರ ಕಾಲೆಳೆಯುವದರಲ್ಲಿ ಯೇ ಕಾಲ ಕರಗಿ ಹೋಗಿದೆ. 

     ಸಂತೋಷದ ಸಂಗತಿ ಇದರಿಂದ ಹೊರತಾದವನು ಗೆಳೆಯ ಉಮೇಶ ತಿಮ್ಮಾಪೂರ. ಇವನ ಅನೇಕ ರಚನೆಗಳಲ್ಲಿ ನನಗೆ ಇಷ್ಟವಾದ ಒಂದು ರಚನೆ ನಿಮ್ಮೊಂದಿಗೆ. . . . .

ನೀನೆಂದರೆ

ಮೈಮುರಿದು ಮಲಗಿದ ಬೆಟ್ಟ

ಸುಖ ಸ್ಪರ್ಶ ನೀಡುವ

ತಂಗಾಳಿ

ತಲೆಯ ತೆವಲಿನ ತುರುಬ

ಬತ್ತಿ ಹೆಣೆದ ಜಡೆಗೆ

ತೀಡಿ ಮಾಡಿದ

ಮುತ್ತು ಮಾಲೆ

ನೀನೆಂದರೆ. .

ಕಾಡು ತೋಪಿನ ಮಾವು

ರೆಂಬೆಗಿಳಿದಾ ಗೊಂಚಲು

ಹಸಿದ ಹೊಟ್ಟೆ ತಣಿದ

ರಸಪಾಕ

ನೀನೆಂದರೆ. .

ಹರಿವ ನೀರ್ಝೆರೆ

ತುಳುಕಿ ದಡ ಸೇರುವ

ತೆರೆ

ಸರಿದ ಕತ್ತಲಿನ

ಸೆರಗ ಮುಡಿಯಲಿ ತುಂಬುವ

ಹಗಲ ಬೆಳಕಿನ

ಕಣ್ಣ ಮಂಜು

ನೀನೆಂದರೆ. .

ಒಡಲು ಬಿರಿದ

ನೆಲದೊಡತಿಯ

ಮಳೆಯ ಮುಂಜಾವ

ಎದೆಯೊಳಗ

         ಪುಳಕಗೊಂಡ ಜಲಕನ್ಯ           

ಗಜಲ್ : ಹೇಮಲತಾ ವಸ್ತ್ರದ.

ಗಜಲ್ : ಹೇಮಲತಾ ವಸ್ತ್ರದ.

Hemalatha Vastrad

ಹೂವಿಗೆ ರೆಕ್ಕೆ ಬಂದಿರುವುದ ಈ ಜಗವೇನು ಬಲ್ಲದು
ಮನ ಗುಲ್ಮೊಹರ್ ಚಿಗುರಿರುವುದ ಈ ಜಗವೇನು ಬಲ್ಲದು

ಅವನು ಸಂತೆಯೊಳಗಿನ ಸಂತನಂತೆ ಎದ್ದು ಹೋದ
ನಾನು ಅವನಾಗಿ ಉಸಿರಾಡುತಿರುವುದ ಈ ಜಗವೇನು ಬಲ್ಲದು

ಮಾತು ಮಾತು ಮಾತು ಅಹಂ ತಣಿಸಲದೇಸು ಮಾತು
ಮೌನದೊಳಗೂ ಮಾತಿರುವುದ ಈ ಜಗವೇನು ಬಲ್ಲದು

ಚೆಂದುಟಿಗಳ ಮೇಲಣ ಮಂದಹಾಸದ ಮಧು
ಹೇಳಲಾರದೇಸೋ ವೇದನೆಗಳಿರುವುದ ಈ ಜಗವೇನು ಬಲ್ಲದು

ಜಗ ನೀತಿ ನಿಯಮಗಳ ಪೀಠ
ಹೃದಯವನೆ ಬಲಿ ಕೊಟ್ಟಿರುವದ ಈ ಜಗವೇನು ಬಲ್ಲದು

ಹಾಸದೊಳಗಿನ ಹಗೆ ಮತ್ಸರದ ಹೊಗೆ
ಬೆಳಕಿನ ಹೆಣ ತೇಲಿರುವದ ಈ ಜಗವೇನು ಬಲ್ಲದು

ಆಡುವರು ಕಾಡುವರು ನೋವು ನೀಡುವರು
ನೋವುಗಳೆ ಶಿಖರ ಮೆಟ್ಟಿಲಾಗಿರುವುದ ಈ ಜಗವೇನು ಬಲ್ಲದು

ಲುಪ್ತವಾಗದೀ ಅಪವಾದಗಳ ಬೇತಾಳದ
ಚಮ್ಮಾವುಗೆ ಮೆಟ್ಟಿಕೊಂಡಿರುವುದ ಈ ಜಗವೇನು ಬಲ್ಲದು

ದಹಿಸುವ ಬದುಕು ಹಸಿ ಕದಳಿ
ಹೇಮೆಯೊಡಲದು ಜೀವಸೆಲೆಯಾಗಿರುವದ ಈ ಜಗವೇನು ಬಲ್ಲದು.
**************

ಡಾ. ಪ್ರಕಾಶ ಗ. ಖಾಡೆ, ಪರಿಚಯ ಮತ್ತು ಅವರ ಕವನಗಳು-- ಈರಣ್ಣ ಮೂಲೀಮನಿ (ಕಸ್ತೂರಿಪ್ರಿಯ) ದುಬೈ.

ಡಾ. ಪ್ರಕಾಶ ಗ. ಖಾಡೆ,ಬಾಗಲಕೋಟ ಪರಿಚಯ ಮತ್ತು ಅವರ ಕವನಗಳು

- ಈರಣ್ಣ ಮೂಲೀಮನಿ (ಕಸ್ತೂರಿಪ್ರಿಯ) ದುಬೈ.
ವಿಭಾಗ ಸಂಪಾದಕರು, ಕಾವ್ಯ ಸಿಂಚನ ವಿಭಾಗ

  ಮೊದಲನುಡಿ:

ಪ್ರೀತಿಯ ಕಾವ್ಯಪ್ರೇಮಿಗಳೇ,
ನಿಮ್ಮೆಲ್ಲರ ಮೆಚ್ಚುಗೆಗೆ ಗಳಿಸುತ್ತಿರುವ "ಕಾವ್ಯ-ಸಿಂಚನ"ವಿಭಾಗಕ್ಕೆ ತಾವು ನೀಡುತ್ತಿರುವ ಪ್ರೋತ್ಸಾಹಕ್ಕೆ ಧನ್ಯವಾದಗಳು.."ಕವಿ-ಕಾವ್ಯ"ಗಳ ಅನ್ವೇಷಣೆ ಕಷ್ಟಕರವಾದರೂ"ಅನೇಕತೆಯಲ್ಲಿ ಏಕತೆ" ಕಾಣುವ ಭಾಗ್ಯ ನನ್ನದು.

ಆತ್ಮಿಯರೇ,
ಯಾರಾದರೂ ಬಾಲ್ಯದಲ್ಲಿನ ಸವಿ ನೆನಪುಗಳನ್ನು ಮರೆಯಬಹುದೆ? "ಜಾನಪದ" ಅಂದ ತಕ್ಷಣ ಹಳ್ಳಿಗಳ ನೆನಪಾಗುವುದು ಸಹಜ. ಅದರಲ್ಲೂ ಹಳ್ಳಿಗಳ ಸಿರಿ -ಜಾನಪದ ಸೊಗಡು . ಆಹಾ ..?ಎಂಥ ಚಂದಾ....ರೀ? ಅದ್ವಿತೀಯ ಜನಪದ ಗಾಯಕ ಶ್ರೀ ಬಾಳಪ್ಪ ಹುಕ್ಕೇರಿಯವರ "ನಮ್ಮ ಹಳ್ಳಿ ಊರ ನಮಗ ಪಾಡ ....ಯಾತಕ್ಕವ್ವಾ ಹುಬ್ಬಳ್ಳಿ ಧಾರವಾಡ? ಜನಪದ ಕೇಳದ ಜನರೇ ಇಲ್ಲ.

ದಿನ ದಿನಕ್ಕೂ ನಶಿಸಿ ಹೋಗುತ್ತಿದ್ದ ಸತ್ವಯುತ ಜಾನಪದಗಳಿಗಾಗಿ  ಹಳ್ಳಿ-ಹಳ್ಳಿಯಲ್ಲಿಯೂ ಸುತ್ತಾಡಿ ಸತ್ವಯುತ ಜನಪದಗಳನ್ನು ಸಂಗ್ರಹಿಸಿ ಅಳಿದು ಹೋಗಬೇಕಾಗಿದ್ದ ಜನಪದ ಸಾಹಿತ್ಯವನ್ನು "ಹಳ್ಳಿ ಹಬ್ಬಿಸಿದ ಹೂಬಳ್ಳಿ" ,"ಬದುಕೇ ಜಾನಪದ"ಆತ್ಮಕಥೆ ಯನ್ನೂ ಬರೆದು  "ಮುಧೋಳ'ದಲ್ಲಿರುವ "ಜನಪದ ನಿಲಯ"ವೆಂಬ "ಜ್ಞಾನ ಗೃಹ"ದಲ್ಲಿರುವ ಹಿರಿಯ ಜಾನಪದ ಸಾಹಿತಿ ಹಾಗೂ ರಾಜ್ಯದ ಜನಪದ ತಜ್ಞ ರಾದ  ಶ್ರೀ ಗಣಪತಿ ಖಾಡೆಯವರನ್ನು ಅಭಿನಂದಿಸುತ್ತೇನೆ.
ತಂದೆಯವರ ದಾರಿಯಲ್ಲೇ ಸಾಗಿ ಜಾನಪದದ ಸಾಹಿತ್ಯದ ಸಾರಸ್ವತ ಲೋಕದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ  ಕವಿ, ಸಾಹಿತಿ, ಸಂದರ್ಶಕ ಹೀಗೆ ಹಲವಾರು ಕನ್ನಡ ಪ್ರಕ್ರಿಯೆಗಳಲ್ಲಿ  ತೊಡಗಿಸಿಕೊಂಡಿರುವ  ಬಾಗಲಕೋಟ ಜಿಲ್ಲೆಯ ಡಾ||ಪ್ರಕಾಶ್ .ಗ.ಖಾಡೆ ಆವರನ್ನು ಈ ವಾರದ ಕವಿಗಳಾಗಿ ಅವರ ಕವಿತೆಗಳೊಂದಿಗೆ ನಿಮ್ಮೆಲ್ಲರಿಗೆ ಪರಿಚಯಿತ್ತಿದ್ದೇನೆ.

ಹಳ್ಳಿಯ ಸೊಗಡು ಆಡು ಮಾತು ಆಳಕ್ಕಿಳಿದು ಜನಮನಕ್ಕೆ ಮುಟ್ಟಿಸುವದು ಮೊದಲಿನಿಂದ ಬಂದ ರೂಢಿ. ಒಟ್ಟಾರೆ ಹೇಳಬೇಕಂದರೆ  "ಆಡು ಮುಟ್ಟದ ಸೊಪ್ಪಿಲ್ಲ ಶ್ರೀ ಖಾಡೆ ಅವರು ಮುಟ್ಟದ ಜಾನಪದವಿಲ್ಲ". ಅವರ ಬರವಣಿಗೆ "ಬತ್ತದಾ ಒರತೆ". ವಂಶ ಪರಂಪರೆ ಯಾಗಿ ಬಳುವಳಿಯಾಗಿ ಪಡೆದ ಶ್ರೀ ಪ್ರಕಾಶ ಖಾಡೆ ಅವರು ನವೋದಯ ಕಾವ್ಯ ತಮಗೇನೂ ಹೊಸದಲ್ಲವೆಂಬಂತೆ ಕಳಿಸಿದ ಎರಡೂ ಕವನಗಳೂ ತುಂಬಾ ಚನ್ನಾಗಿವೆ.

ನೀವೆಲ್ಲ ಬಾಲ್ಯದಲ್ಲಿನ ಆ ಮಾತೃ ಮಮತೆಯನ್ನು ಅನುಭವಿಸಿದ್ದೀರಿ. ಅದರಂತೆ  ಕವಿ ಶ್ರೀ ಪ್ರಕಾಶ್ ಮೊದಲನೆಯ ಕವಿತೆ "ಮತ್ತೆ ಬಾಲ್ಯಕ್ಕೆ..." ಓದುತ್ತಾ ಹೋದಂತೆ ನಾನು ಭಾವುಕನಾಗಿ ಅತ್ತು ಬಿಟ್ಟೆ. ಹುಟ್ಟಿದ 2 ತಿಂಗಳಿನಲ್ಲಿ ತಾಯಿಯನ್ನು ಕಳೆದುಕೊಂಡ ಎಂಥ ನತದೃಷ್ಟ ನಾನು ಅನ್ನಿಸುತ್ತೆ. ಕವಿ ಪ್ರಕಾಶ್ ತಮ್ಮ  ಬಾಲ್ಯದ ಮಾತೃ ಮಡಿಲಿನ ಮಾತೃಬಂಧದ ಸುಮಧುರ ಅನುಬಂಧವನ್ನೇ ಕಾವ್ಯವನ್ನಾಗಿರಿಸಿಕೊಂಡು ರಚಿಸಿದ ಉತ್ತಮ ಕವಿತೆ ಇದೆಂದರೂ ತಪ್ಪೇನೂ ಇಲ್ಲ.
ಸುಂದರ ಶಬ್ದ, ಸರಳ ಪ್ರಾಸಗಳಿಂದ ಹೆಣೆದ  ಇವರ ನವ್ಯಕಾವ್ಯ ಅಲ್ಲಲ್ಲಿ ಜಾನಪದದ ಸೊಗಡನ್ನು ಬಿಂಬಿಸ್ತಾ ಇದೆ. ಪ್ರಸ್ತುತ ಕವಿತೆಯ  ಮೊದಲ ಎರಡು ಸಾಲುಗಳೇ  ಹೇಳುವಂತೆ "ಅವ್ವನ ನೆನೆಸಿಕೊಂಡಾಗಲೆಲ್ಲ,ಬಾಲ್ಯವೇ ಕಣ್ಣೆದಿರು ಬಿಚ್ಚಿಕೊಳ್ಳುತ್ತದೆ ..." ಎಂಥ ಸುಂದರ ಸವಿ ನೆನಪು. ಮಾತೃ ಮಡಿಲಿನ ಆ ಪ್ರೇಮ, ಅಣ್ಣ-ತಮ್ಮ, ಅಕ್ಕ-ತಂಗಿ, ಆ ಒಡನಾಟ. ಆ ಸಿಟ್ಟು, ನಂತರದ ಮರೆಯಲಾಗದ ಆ ತಾಯಿಯ ಸಾಂತ್ವನ  ಎಲ್ಲವನ್ನೂ ಮನಸಾರೆ ಅನುಭವಿಸಿದ ಕವಿಗೆ ದೊಡ್ದೊರಾಗೋದೇ  ಬೇಡ ಎನ್ನಿಸಿದ್ದು ಸಹಜ. ಅವರಿಗಷ್ಟೇ ಏಕೆ ಹುಟ್ಟಿದ ಪ್ರತಿ ಜೀವಿಯೂ ಬಯಸೋದು ಹಾಗೇನೆ. ಕೊನೆ ಕೊನೆಗೆ ಬಾಲ್ಯದಾಡಿದ, ಆ ಮಾತೃ ಸ್ಪರ್ಶದಲ್ಲಿ ಮರೆತ ಆ ನೋವು ಎಲ್ಲವನ್ನೂ ಅನುಭವಿಸಿದ ಕವಿ ಬೆಳೆದು ದೊಡ್ಡವರಾದ ಮೇಲೆ ನಾವು ಯಾಕೆ ದೊಡ್ಡೋರಾದೆವೋ ?ಛೆ! ನಾವು ದೊಡ್ದೊರಾಗಬಾರದಿತ್ತು? ಎಂದು ಮನದಾಳದ ಅಳಲನ್ನು ತೋಡಿಕೊಂಡಿದ್ದಾರೆ.

ಎರಡನೆಯ "ಅದಕಂದರ ಬದುಕ" ಕವಿತೆಯಲ್ಲಿ ಬಳಸಿದ ಪ್ರಾಸ ಪದಗಳ ಬಳಕೆ ನಿಜಕ್ಕೂ ಚನ್ನಾಗಿದೆ. ಆಡು ನುಡಿಯಲ್ಲಿ ಬೇರೆವಂಥ ಅವರ ಬತ್ತದ "ಒರತೆ" ಜನಪದದಲ್ಲಿ ಪ್ರಾವಿಣ್ಯತೆ ಪಡೆದಿರುವ ಕವಿ ಶ್ರೀ ಪ್ರಕಾಶ್ .ಗ.ಖಾಡೆ ಅವರು ಗ್ರಾಮ್ಯಭಾಷೆಯನ್ನು ಶಿಷ್ಟಪದಗಳ ಜತೆ ಜತೆ ಬೆರೆಸಿದ್ದು ನಾಡಿನ ಜಾನಪದ ಸೊಗಡಿನ ಕಾವ್ಯಕ್ಕೆ ಮೆರಗು ನೀಡಿದೆ.

"ಹರೆಯದ ಹೆಣ್ಣಿನ  ಬದುಕಿನ ಸತ್ಯ"ಮೂಲ ಕಾವ್ಯವಸ್ತು ವನ್ನಾಗಿರಿಸಿದ ಕವಿತೆಗೆ ನೀಡಿದ  ಶೀರ್ಷಿಕೆ ನಿಜಕ್ಕೂ ಅರ್ಥಪೂರ್ಣವಾಗಿದೆ. ಎಷ್ಟೊಂದು ಮಾರ್ಮಿಕ ಈ ಚರಣ-
"ಹೊಸಾ ಚೆಲುವಿಕಿ ಕಂಡವರ ಒಲವಿಕಿ
ಸೇರಿ ಬೆಳೆಸಿತ ಸಂಬಂಧ
ಇರುತನಾ ಎಂಥ ಆನಂದ
ಹೂವಾಗಿ ಅರಳಿದ ವ್ಯಾಳೇಕ ಏಸೋಂದು ದುಂಬಿ ಸಾಲ||"

ಅರಳಿದ ಹೂವಿನ ಮಕರಂದವನರಸುವ ಸುತ್ತ ಹಾರಾಡುತ್ತಿರುವ ದುಂಬಿಗಳ ಹೋಲಿಸುತ್ತ -ಯೌವ್ವನದ ಹೊಸಿಲಲ್ಲಿ ನಿಂತಿರುವ ಹೆಂಗಳೆಯರಿಗೆ  "ಅದಕಂದರ ಬದುಕ" ಕವಿತೆಯ ಕೊನೆಯ ಚರಣದಲ್ಲಿ ಅರಿತೋ ಅರಿಯದೆಯೋ ಮಾಡಿದ ತಪ್ಪಿಗೆ ಫಲ ಅನುಭವಿಸೋಳು ಹೆಣ್ಣೇ ..
" ಬಿದ್ದ ಬೀಜದ ಮೊಳಕಿ
ಮತ್ತು ಹೊಸಾ ಹಾದಿ ಹುಡುಕಿ
ಗಾಳಿದಾಳಿಗಿ ಹಾರಿ ಹಾರ್ಯಾಡಿ
ಉಳಿದ್ಹಾಂಗ ಆತ ಸುಮ್ಮಕ-
ಯಾಕ ಬೇಕ ನೂಕ
ನೊಂದವರ ಹಾಡಿರಲಿ ಬೆಳಕ ಹರಿವತನಕ||

ಮೂಲಕ ಎಚ್ಚರಿಸುವ  ಸಂತೈಸುವ ರೀತಿ ಮೆಚ್ಚುಗೆಯಾಯ್ತು. ಬರೆದ  ಕಾವ್ಯ-ಹಾಡುವ ಹಾಡು  ಜನ ಮನ ತಲುಪುವಂತಾದರೆ, ಸ್ತ್ರೀ ಶೋಷಿತ ಸಮಾಜದ ಪರಿವರ್ತನೆಯಾಗುವಲ್ಲಿ ನೆರವಾದರೆ  ಬರೆದ ಕವಿತೆ ಸಾರ್ಥಕವಾದೀತು ಎಂದು ನನ್ನ ಅನಿಸಿಕೆ. ಸಾಹಿತ್ಯದ ಎಲ್ಲಾ ಪ್ರಕಾರಗಳಲ್ಲೂ ಅನುಭವಿ, ಕವಿ ಶ್ರೀ ಪ್ರಕಾಶ್ .ಗ. ಖಾಡೆ ಅವರ ಕವಿತೆಗಳು ನಿಮ್ಮೆಲ್ಲರ ಮೆಚ್ಚುಗೆ ಗಳಿಸುವುದರಲ್ಲಿ ಸಂದೇಹವೇ ಇಲ್ಲ. ಆದರೂ ಇದರ ತೀರ್ಪುಗಾರರು ನೀವು  ಓದುಗರು. ನಿಮ್ಮ ಮುಕ್ತ ಪ್ರತಿಕ್ರಿಯೆಯೇ ಕವಿಗಳಿಗೆ ಹೆಚ್ಚಿನ ಸ್ಫೂರ್ತಿ. ಸಾಹಿತಿ, ಕವಿ ಶ್ರೀ ಪ್ರಕಾಶ್ ಗ.ಖಾಡೆ ಅವರ ಮುಂದಿನ ಸಾಹಿತ್ಯ ಪ್ರಕ್ರಿಯೆಗಳಿಗೆ ಯಶಸ್ಸನ್ನು ಕೋರುವೆ.
- ಈರಣ್ಣ ಮೂಲೀಮನಿ (ಕಸ್ತೂರಿಪ್ರಿಯ) ದುಬೈ.
ವಿಭಾಗ ಸಂಪಾದಕರು, ಕಾವ್ಯ ಸಿಂಚನ ವಿಭಾಗ

ಕವಿ ಪರಿಚಯ : 
ಡಾ|| ಪ್ರಕಾಶ ಗ. ಖಾಡೆ,ಬಾಗಲಕೋಟ.
ಡಾ. ಪ್ರಕಾಶ ಗಣಪತಿ ಖಾಡೆ ಅವರು ಜಮಖಂಡಿ ತಾಲೂಕಿನ ತೊದಲಬಾಗಿ ಗ್ರಾಮದಲ್ಲಿ 10-06-1965 ರಂದು ಜನಿಸಿದರು. ಓದಿದ್ದು ತೊದಲಬಾಗಿ, ಕೆರೂರ (ಬದಾಮಿ), ಇಳಕಲ್ಲ ಹಾಗೂ ಧಾರವಾಡಗಳಲ್ಲಿ, ಕನ್ನಡದಲ್ಲಿ ಎಂ.ಎ.ಪ್ರಥಮ ದರ್ಜೆಯಲ್ಲಿ ಪಾಸಾಗಿ 2005ರಲ್ಲಿ ಹಂಪಿ ಕನ್ನಡ ವಿಶ್ವವಿದ್ಯಾಲಯದಿಂದ "ನವೋದಯ ಕಾವ್ಯದ ಮೇಲೆ ಜಾನಪದದ ಪ್ರಭಾವ" ಮಹಾ ಪ್ರಬಂಧಕ್ಕೆ ಪಿಎಚ್.ಡಿ. ಪದವಿ ಪಡೆದರು. ಬೈಲಹೊಂಗಲ,ಚಂದರಗಿ ಕಾಲೇಜುಗಳಲ್ಲಿ ಕನ್ನಡ ಉಪನ್ಯಾಸಕರಾಗಿ, ಬಾಗಲಕೋಟ ಸಕ್ರಿ ಪತ್ರಿಕೋದ್ಯಮ ವಿಭಾಗ ಮತ್ತು ಇಳಕಲ್ಲ ವಿಜಯ ಚಿತ್ರಕಲಾ ಸ್ನಾತಕೋತ್ತರ ಕಾಲೇಜು ವಿಭಾಗದಲ್ಲಿ ಸಂದರ್ಶಕ ಪ್ರಾಧ್ಯಾಪಕರಾಗಿ ಸೇವೆ. ಸಾಹಿತ್ಯ, ಪತ್ರಿಕೋದ್ಯಮ, ರಂಗಭೂಮಿ, ಜಾನಪದ, ಶಿಕ್ಷಣ, ಸಂಶೋಧನೆ ಹಾಗೂ ಸಂಘಟನೆ ಕ್ಷೇತ್ರದಲ್ಲಿ ಸದಾ ಕ್ರಿಯಾಶೀಲ ವ್ಯಕ್ತಿತ್ವ, ಕನ್ನಡದ ಪ್ರಮುಖ ಪತ್ರಿಕೆಗಳಲ್ಲಿ, ಆಕಾಶವಾಣಿ, ದೂರದರ್ಶನಗಳಲ್ಲಿ ನಿರಂತರವಾಗಿ ಲೇಖನ, ಕವಿತೆ, ಕಥೆ, ವಿಮರ್ಶೆ ಪ್ರಕಟ ಮತ್ತು ಪ್ರಸಾರಗೊಂಡಿವೆ.
ಈವರೆಗೆ "ಗೀತ ಚಿಗಿತ", "ಪ್ರೀತಿ ಬಟ್ಟಲು", "ತೂಕದವರು", ನವೋದಯ ಕಾವ್ಯದ ಮೇಲೆ ಜಾನಪದದ ಪ್ರಭಾವ, ಕೃಷ್ಣಾ ತೀರದ ಜನಪದ ಒಗಟುಗಳು, ಜಾನಪದ ಹೆಬ್ಬಾಗಿಲು, "ಮುನ್ನುಡಿ ತೋರಣ", ಜತ್ತಿ ಕಾವ್ಯಾಭಿವಂದನ, ನೆಲಮೂಲ ಸಂಸ್ಕೃತಿ, ಕನ್ನಡ ಪತ್ರಿಕೆ ಮತ್ತು ಸಾಹಿತ್ಯ, ಜಾನಪದ ಕೋಗಿಲೆ ಗೌರಮ್ಮ ಚಲವಾದಿ, ಸಾಹಿತ್ಯ ಸಂಗತಿ, ಮೌನ ಓದಿನ ಬೆಡಗು ಸೇರಿದಂತೆ 21 ಕೃತಿಗಳು ಪ್ರಕಟ.

ಮುಧೋಳ, ಶಿವಮೊಗ್ಗ ಮತ್ತು ವಿಜಾಪುರಗಳಲ್ಲಿ ಜರುಗಿದ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನ ಹಾಗೂ ಕೇರಳದಲ್ಲಿ ಜರುಗಿದ ಕನ್ನಡ ಸಮ್ಮೇಳನದಲ್ಲಿ ಪ್ರಬಂಧ ಮಂಡನೆ. ಉತ್ತಮ ವಾಗ್ಮಿ, ಅಪರೂಪದ ಶಿಕ್ಷಣ ಚಿಂತಕ ಡಾ|| ಪ್ರಕಾಶ ಖಾಡೆ ಬಾಗಲಕೋಟ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿಗಳಾಗಿಯೂ ಕಾರ್ಯನಿರ್ವಹಿಸಿದ್ದಾರೆ. ಕನ್ನಡ ಜಾನಪದ ವಿದ್ವಾಂಸರ ಸಾಲಿನಲ್ಲಿ ಡಾ.ಖಾಡೆ ಅವರದು ಎದ್ದು ತೋರುವ ಹೆಸರು. ಬಾಗಲಕೋಟ ಜಿಲ್ಲಾಡಳಿತವು 2014 ರ ಗಣರಾಜ್ಯೋತ್ಸವ ಪ್ರಶಸ್ತಿ ನೀಡಿ ಸತ್ಕರಿಸಿದೆ.

ವಿಳಾಸ:  ಡಾ. ಪ್ರಕಾಶ. ಗ. ಖಾಡೆ.
‘ಶ್ರೀಗುರು’ ಸರಸ್ವತಿ ಬಡಾವಣೆ,ಸೆಕ್ಟರ್ ನಂ.63, ನವನಗರ, ಬಾಗಲಕೋಟ.
ಮೊ: 9845500890
e-mail:drprakashkhade@gmail.com



- See more at: http://suddibantwala.com/article/view/20#sthash.1k53oiIJ.dpuf

ಕೃಪೆ :ಸುದ್ದಿ ಬಂಟ್ವಾಳ

ಬಸೂ ಅವರ ಪದ್ಯಗಳು.

ಬಸೂ ಅವರ ಪದ್ಯಗಳು.

 

Basavaraj Sulibhavi 

1
ಬೆಳಗು ಲೋಕ ದಿಟ್ಟಿಸಿದ ಹೂ ಸಂಜೆ ಗರ್ಭಗುಡಿಯಲ್ಲಿ ಕಣ್ಮುಚ್ಚಿತು
ಗೆಳೆಯಾ ಇಷ್ಟೇ ಪದಗಳಲಿ ಇಂಡಿಯಾದ ಚಿತ್ರ ಪೂರ್ಣಗೊಂಡಿತು 

2
ಚಿನ್ನದಸರ ಪ್ರಗತಿಪರನ ಕೊರಳ ಬಂಧನ ಬಯಸಿತು
ಚಳುವಳಿಯ ಕಥೆ ಪೂರ್ಣ ಮುಗಿಯಲು ಇಷ್ಟೇ ಸಾಕಾಯಿತು

3
ಬೀದಿಯ ನಗುವಿಗೆ ಸೂತಕದ ಮನೆಯ ಬಿದಿರುಮೆಳೆ ಹೂ ಕಂಡಿತು
ಮುಳುಗುವ ಕೈ ತೇಲಿಬಂದ ಮುಳ್ಳುಕಂಟಿಯನೇ ತಬ್ಬಿಕೊಂಡಿತು

4
ಇರುಳ ಚಳಿಗಾಳಿಗೆ ನಿಲ್ದಾಣದಲಿ ಕೈ ತಾಗಿದವರು ಜೋಡಿಯಾದರು
ಬೀದಿಬೆಂಕಿಯೆದುರು ಬೆಚ್ಚಗಾಗಲು ಹುಚ್ಚು ಕನಸು ಮೈಲಿಗೆ ಬಿಟ್ಟು ಓಡಿಬಂದವು

5
ಏನೋ ಬರೆಯಬಹುದಾಗಿದ್ದ ಖಾಲಿಕಾಗದ ಮುದುಡಿ ಗಾಳಿಗಂಟಿತು
ನನ್ನದೇ ಕವಿತೆಗಳು ಪಕ್ಕದ ಹಾದಿಯಲಿ ಅಪರಿಚಿತರಂತೆ ನಡೆದುಹೋದವು

6
ನಗುವ ಮಗಳು ಆಟವಾಡುವುದ ನೋಡಿ ಕವಿತೆ ಬರೆಯಬೇಕೆನಿಸಿತು
ಕ್ಷಮಿಸು ಓದುಗ ಕಾಗದದ ತುಂಬ ಅಳಲ ಶಬ್ದಗಳೇ ತುಂಬಿಕೊಂಡವು

7
ಬದಲಾದ ಮನೆಯಲ್ಲಿ ಅವಳು ರೊಟ್ಟಿ ಬಡಿವ ಸದ್ದಾಯಿತು
ಈ ಮನೆಯ ಹೆಂಚಿನಲ್ಲೂ ನೀರು ಮಳಮಳಿಸುವ ಅನುಭವಾಯಿತು

8
ಚಾಕು ಚೂರಿ ಬಂದೂಕು ಬಿಡಿ, ಜಿರಲೆ ಕಂಡರೂ ಹೆದರುವವರಿದ್ದರು
ಎಂದಿಗೂ ಕನಸು ಕೊಂದವರು ಕೊಲೆಗಾರರ ಪಟ್ಟಿಯಲ್ಲಿ ಬರಲೇ ಇಲ್ಲ

9
ಮಗಳು ಗೀಚಿದ್ದ ಪ್ರೇಮ ಕವನ ವರನ ಕುರಿತೇ ಬರೆದಿದ್ದೆಂದು ಅವ್ವ ಪರಿಚಯಿಸಿದಳು.
ಆ ಮಾತುಗಳ ಕೇಳಿಯೂ ದೂರದಲಿ ಒಂಟಿ ನಿಂತ ಕಣ್ಣುಗಳು ಯಾಕೊ ಒದ್ದೆಯಾದವು.

10
ಕಿಸೆ ತುಂಬ ರೊಕ್ಕ ಇಟ್ಟುಕೊಂಡೇ ಹೊಸ್ತಿಲೊಳಗೆ ಕಾಲಿರಿಸಿದ್ದರು
ದೀಪವಾರಿಸಿ ಮೈತುಂಬ ಹಲ್ಲಹಚ್ಚಿ ತುಟಿಗೆ ಕತ್ತಲಂಟಿಸಿ ಹೋದರು

11
ಕುಣಿಯುತಿದೆ ಕಿವುಡರಂಗಳದಲ್ಲಿ ಗಾಂಧಿ ಗೆಜ್ಜೆಯ ಕೋಲು
ಎಲ್ಲರ ಬಾಯಲ್ಲೂ ಒಂದೇ ದನಿ ಅಹಾ.. ನಾದವು ಅದ್ಭುತ

12
ಮೊದಲ ಹೆಜ್ಜೆಯಲ್ಲೇ ಕಲ್ಲೆಂದು ದೂರ ಸರಿದರು
ಕಲ್ಲಿನಿಂದ ಮನೆ ಮಾಡಿಕೊಂಡವರು ಬೆಚ್ಚಗಿದ್ದರು

13
ಕವಿ ಉದುರುವ ಹೂವಿನ ಹಾಗೆ
ಕವಿತೆ ಹೂ ಉದುರಿದ ಮೇಲೂ ಉಳಿವ ಗಂಧದ ಹಾಗೆ..

14
ಕವಿತೆ ಎಂದರೆ ಇಷ್ಟೇ
ಬರೆದ ಮೇಲೆ ಬೆಳೆಯುತ್ತಲೇ ಹೋಗುವುದು

15
ಎಳೆಬಿಸಿಲ ಅಂಗಳದಲ್ಲಿ ಕವಿತೆ ಕೊಕ್ಕು ಚಾಚಿತು
ಹೊಸದಾರಿಯ ಯಾವುದೊ ತಿರುವಿನಲ್ಲಿ ಹಕ್ಕಿಯ ಪುಕ್ಕ ಬಿದ್ದಿತ್ತು

16
ಹೆರುವಾಗ ಇನ್ನು ಮುಂದೆ ಗಂಡನ ಸಹವಾಸವೇ ಬೇಡವೆಂದು ನರಳಿದಳು
ಹೆತ್ತು ನಾಲ್ಕು ತಿಂಗಳಾಗುವ ಮುನ್ನವೇ ನಾಚುತ್ತ ಮೆಲ್ಲನೆ ಗಂಡನೆದೆಗಾನಿದಳು
************

ಕಿರಸೂರ ಗಿರಿಯಪ್ಪ ದ್ವಿಪದಿಗಳು.

             











                ಕಿರಸೂರ ಗಿರಿಯಪ್ಪ (ಗಿರೀಶ ಆಸಂಗಿ)

       "ಕಣ್ಣೀರು ಎಷ್ಟೇ ಸುರಿದರು ಬತ್ತದ ಜಲ
       ಮತ್ತೇ ಮತೇ ಸುರಿದು ದು:ಖದ ಆಪ್ತತೆಯೊಡನೆ ಸಮ್ಮಿಲನ"
       
                   2
       ಅವಳೊಮ್ಮೆ ಮಿಂಚಿ ನಕ್ಕ ಕ್ಷಣ
       ಹದವರಿತ ಮಣ್ಣು ಪಿಸುಗುಟ್ಟಿ ಮಕ್ಕಳ ಸಂತೈಸುವುದು"
       
                    3
       "ನನ್ನ ಇತಿಮಿತಿಯೊಳಗೆ ಹೊರಳಾಡಿದ ಮಸಿ
       ಒಂದೊಮ್ಮೆ ವ್ಯಾಪಿತಗೊಳ್ಳಲು ಪರದಾಡಿ ರಕ್ತ ಮಡುಗಟ್ಟಿ ನಿಂತಿತು"
             
                    4        
      "ಪುಸ್ತಕ ನಮ್ಮೆಲ್ಲರ ಜೀವಂತಿಕೆಯ ಮತ್ತೋಂದು ದನಿ
       ಎಲ್ಲೊ ಗತಿಸಿಹೋಗುತ್ತಿರುವ ಅಮಾಯಕರ ಕೊರಳ ನೆರಳಂತೆ"
           
                    5
      "ಕಾವ್ಯಕ್ಕೂ ಜೀವವಿದೆ ಎಂದು ಗೊತ್ತಾಗಿದ್ದು
       ನನ್ನನೆ ಸಂತೈಸಿ ಬೆರಳಡಿಯಲಿ ವಶ್ವರೂಪ ಪಡೆದ ಮೇಲೆ"
             
                     6
      "ಅವರು ರಸ್ತೆ ಬದಿ ತೊಟ್ಟಿಕ್ಕಿದ ರಕ್ತದ ಮೇಲೆ ನಡೆದಾಗ
      ಗೂಡಿಸಲ ಕೂಗು ಕಾಂಕ್ರೀಟಾಗಿ ಪರಿವರ್ತನೆ"

ಹೊಸ ವರ್ಷದ ಅಂಗಳ ತುಂಬ...

ಬಸೂ ಅವರ ದ್ವಿಪದಿಗಳು.

ಹಣತೆ ಹೊಸ ವರ್ಷದ ತೈಲದಿಂದ ತುಂಬಿತು
ಆ ಉರಿವ ಸೊಡರು ಮತ್ತಷ್ಟು ಸಣ್ಣದಾಯಿತು
2
ಲೋಕವೆಲ್ಲ ಹೊಸ ವರ್ಷದ ಸಂಭ್ರಮದಲಿ ಮುಳುಗಿತ್ತು
ನಿಶಬ್ದವಾಗಿ ದೇಹ ಕಟ್ಟಡದ ಒಂದು ಕಲ್ಲು ಉದುರಿ ಬಿದ್ದಿತು
3
ಇರುಳ ಕೆಚ್ಚಲಿಗೆ ಯಾರು ಕೈಯಿಟ್ಟರೋ
ನೆಲದವ್ವನ ಪಾತ್ರೆ ತುಂಬ ನೊರೆ ನೊರೆ ಹಾಲು
4
ಹೊಸ ವರ್ಷದ ಅಂಗಳದ ತುಂಬ ಮಗಳು ಬಣ್ಣ ಬಣ್ಣದ ರಂಗೋಲಿ ಚಿತ್ರವಿಟ್ಟಳು
ನಡುಮನೆಯಲಿ ಹಸಿ ಆರಿದ ದೇಹದ ಬಟ್ಟೆ ಕಂಡು ಅವ್ವನ ಕಣ್ಣು ತುಂಬಿಕೊಂಡವು
5
ಮಾಗಿಯ ಕಾಲದ ನದಿಗಿಳಿಬಿಟ್ಟ ಬೆರಳು ಜುನುಗುಟ್ಟಿ ಸೆಟೆದುಕೊಂಡವು
ಬೆರಳು ಬೆಚ್ಚಗಾಗಲು ತುಟಿಗೆ ಸವರಿಕೊಂಡರೆ ತುಟಿ ಸುಟ್ಟು ಕಪ್ಪಗಾದವು
6
ಗಾಳಿ ಬೀಸಿದ್ದರೆ ಆ ದಿನ ಗೌಡರ ಹುಡುಗನ ಬುತ್ತಿಗಂಟಿನ ರೊಟ್ಟಿ ನನ್ನೆಡೆಗೆ ಹಾರಿಬರುತ್ತಿತ್ತು
ಆ ಹುಡುಗ, ರೊಟ್ಟಿಗಿಂತ ಬೀಸದ ಗಾಳಿಯ ಚಿತ್ರವೇ ಯಾಕೊ ನನ್ನಲ್ಲಿನ್ನೂ ಉಳಿದುಬಿಟ್ಟಿದೆ
7
ಅವಳು ದಿನಕ್ಕೊಮ್ಮೆಯಾದರೂ ಅನ್ನುತ್ತಾಳೆ ನಿನ್ನದು ಮಾಗಿದ ಮನಸು ಗೆಳೆಯಾ
ಮಾಗಿದ ಹಣ್ಣು ತೊಟ್ಟಲ್ಲಿ ತುಂಬ ಹೊತ್ತು ನಿಲ್ಲದು ಎನ್ನಲಾಗದೆ ಮೌನವಾಗುತ್ತೇನೆ
8
ಹಗಲು ಎಲ್ಲವೂ ಸಲೀಸಾಗಿಯೇ ನಡೆದುಹೋಯಿತು
ನಾನ್ಯಾರು ನೀನ್ಯಾರೆಂದು ತಿಳಿಸಲು ರಾತ್ರಿಯೇ ಬರಬೇಕಾಯಿತು
9
ಬೀಸಿಬಂದ ಗಾಳಿಗೆ ಅವಳ ಚಿತ್ರವಿದ್ದ ಹಾಳೆ ಹಾರಿಹೋಯಿತು
ಅವನ ಕೈಯಲಿ ಮತ್ತೆ ಚಿತ್ರ ಬರೆವ ಕ್ಷಣಗಳು ಹುಟ್ಟಿಕೊಂಡವು
10
ಆ ಬೆಳಗು ಮಾಗಿಯ ತಣ್ಣನೆಯ ಗಾಳಿ ಎದೆಗೆ ಬಡಿಯಿತು
ಆತ್ಮದ ನೋವುಗಳಿಗೆ ಹೆಸರೇ ಇಲ್ಲವೆಂದು ಹಿಂತಿರುಗಿತು
11
ವರುಷವಿಡೀ ಸಾಲದಂತೆ ಬೆಳೆದ ಖಾಲಿತನ
ಮಾಗಿಯ ಗಾಳಿ ಸ್ಪರ್ಷಕೆ ದ್ವಿಗುಣಗೊಂಡಿತು

-ಬಸವರಾಜ ಸೂಳಿಬಾವಿ.